–Հայաստանում գինեգործության զարգացումը մի շարք խոչընդոտների առջև է կանգնած,– այսօրվա ասուլիսին լրագրողներին ասել է Հայաստանի գինեգործների միության նախագահ Ավագ Հարությունյանը։

Բանախոսը նշել է, որ չնայած այս տարին խաղողագործների համար խոստանում էր բերքառատ լինել, ինչը կնպաստեր գինու արտադրության և վաճառքի ծավալների աճին, սակայն խաղողի բերքի մինչև 95 տոկոսը գնում է կոնյակի արտադրությանը։

–Բանն այն է, որ կոնյակ պատրաստելու համար խաղողը պիտանի է արդեն սեպտեմբերին, իսկ գինու խաղողը հասնում է միայն հոկտեմբերին։ Կան խնդիրներ նաև գինու սպառման շուկաների ոլորտում։ Չնայած Ռուսաստանի և Վրաստանի միջև առկա խնդիրներին, կարծես թե բարենպաստ պայմաններ են ստեղծվում այդ շուկայի գրավման համար, բայց հայկական գինին զբաղեցնում է այդ ահռելի շուկայի 0,1 տոկոսը,–նշել է փորձագետը։

Խոսելով պատճառների մասին՝ նա նշել է պետության աջակցության բացակայությունը և բերել նույն Վրաստանի օրինակը. վրացական գինեգործները շատ արագ կարողացան իրենց տեղը զբաղեցնել եվրոպական շուկայում հենց պետական աջակցության շնորհիվ։

–Անհրաժեշտ են միջպետական առևտրային համաձայնագրեր։ Ի դեպ, Հայաստանի գինեգործների միությունը դիմել է կառավարությանը, սակայն պատասխան է ստացել, որ կառավարությունն ունի ավելի կարևոր գործեր, քան գինեգործների խնդիրները լուծելը,–ընդգծել է Հարությունյանը։

Անդրադառնալով հողահարկի զիջման կառավարության որոշմանը՝ նա ասել է, որ տույժ–տուգանքները, անշուշտ, պետք է հանվեին գյուղացուն լրացուցիչ բեռից ազատելու համար, սակայն Հայաստանն իրավական պետություն է, և նմանատիպ քայլերն անարդար են այն գյուղացիների և ընդհանրապես քաղաքացիների հանդեպ, ովքեր կանոնավոր վճարել են բոլոր հարկերը։

7or.am